पडद्याआडच्या प्रचारात भाजपची सरशी! – दै. प्रहार

निवडक अग्रलेख – १९ ऑगस्ट २०१९

मटा – मोदी सरकारने जनतेला पाजलेली विकासाची अफू उतरायला लागल्यामुळे आर्थिक संकट जाणवू लागले आहे. विशेषतः वाहन क्षेत्रातल्या चिंताजनक मंदीचा उहापोह आजच्या अग्रलेखात मटाने केला आहे.

तालिबान- अल कायदा – आयसीस या दहशतवादी संघटनांची थोडक्यात जन्मकथा, त्यांचा आयएसआय आणि पाकिस्तानशी असलेला संबंध, या सर्वांमुळे झालेली अफगणिस्तानची दुर्दशा, आणि त्यांचा काश्मिरवर होवू शकणारा परिणाम असा विस्तृत आलेख लोकसत्ताचा अग्रलेख वाचकांसमोर आज मांडतोय.

‘तृष्णेकाठची वेदना’ या सकाळच्या अग्रलेखात महापूर आणि कोरडा दुष्काळ हे एकाच वेळी भोगाव्या लागणाऱ्या अनुक्रमे पश्चिम महाराष्ट्र आणि मराठवाडा- विदर्भ येथील शेतकऱ्यांची व्यथा मांडली आहे. पण या समस्येवर नवीन पद्धतीचा तोडगा काढायला हवा असं सुचवणारा हा अग्रलेख, ती पद्धत कोणती याबद्दल काहीच सांगत नाही.

‘उडाले ते कावळे, राहिले ते मावळे’ ही मूळ शिवसेनेची घोषणा, हल्ली स्वतःच्या पक्षातील आउटगोइंग वर वापरणारे शरद पवार यांची खिल्ली उडवणारा सामना चा अग्रलेख धमाल आहे. आणि … ” २०१४ मध्ये विधानसभा निवडणुकांचे निकाल जाहीर होण्याआधीचं बिनशर्त पाठिंबा देत भाजपला सरकार बनवण्याचे आमंत्रण देणारे कावळे राष्ट्रवादीचेचं होते. हा चोंबडेपणा करण्याची तशी गरज नव्हती. राष्ट्रावादीच्या कावळ्यांनी तेव्हा ही फालतू काव काव केली नसती तर पुढच्या पाच वर्षात महाराष्ट्राचे राजकारण नव्या वळणावर वाहताना दिसले असते. ” हे वाक्य इतकं सूचक आहे की त्याचे असंख्य अर्थ निघू शकतात. राजकारणाचे पदर जाणणाऱ्या वाचकासाठी हे खाद्य आहे.

‘बेपर्वाईचे बळी ‘ हा दिव्य मराठीचा लघु-अग्रलेख वाहतूक समस्या, अपघात, रस्ते सुरक्षेचा अभाव इत्यादींची चर्चा करतोय.

तरुण तेजपाल या तहलका.कॉम च्या मालकाचा उदय, त्याची माजोरी, स्त्री कर्मचाऱ्यावर त्याने केलेला अतिप्रसंग, न्यायालयाने जलद न्यायासाठी दिलेले आदेश, अशा एका वेगळ्या प्रकरणाची दखल घेणारा पुढारी चा अग्रलेख वाचण्याजोगा आहे.

अमेरिकेचे आततायी अध्यक्ष डोनाल्ड ट्रम्प यांच्या डोक्यात, उत्तर ध्रुवाजवळील ग्रीनलँड हे बेत डेन्मार्ककडून विकत घेण्याचे बेत घोळत आहेत. तिथे आपली अण्वस्त्रे नेऊन रशिया, चीन आणि युरोप आपल्या माऱ्याच्या टप्प्यात आणावेत हा त्यामागील अंतस्थ हेतू. या कृतीचे परिणाम आणि अन्वयार्थ लावणारा लोकमतचा अग्रलेखही वेगळा आहे.

तीन तलाक या विषयावर कॉंग्रेस विरोध करूच कसा शकते ? हा सर्वांनाच भेडसावणारा प्रश्न विचारत नागपूर तरुण भारत, मुस्लिमांनी आपले हितचिंतक कोण आहेत हे ओळखावे ( भाजप ) असं निवेदन अग्रलेखाद्वारे करतो.

पुण्यनगरी आणि बेळगाव तरुण भारत यांचे ई पेपर प्रसिद्ध न झाल्याने वाचता आले नाही.

लोकसभेतील प्रचंड विजयामुळे भाजप आश्वस्त झाला आहे. केंद्रात आणि राज्यात असलेल्या सत्तेचा पुरेपूर वापर घेऊन महाराष्ट्रात येत्या विधानसभा निवडणुकांसाठी कशाप्रकारे आणि किती प्रचंड प्रमाणात भाजपने तयारी सुरु केली आहे, याचे दर्शन घडवणारा अग्रलेख सर्व विरोधी पक्षांनी आणि भाजप विरोधकांनी वाचण्याजोगा आहे. त्यामुळे आजच्या निवडक अग्रलेखाचा मान प्रहार कडे.

खालील लिंकवर क्लिक करून हा लेख आपण वाचू शकाल.

http://prahaar.in/bjps-lead-in-campaigning/

दैनिक प्रहार, संपादक- विजय बाबर

**********

सदर अग्रलेखाबद्दल आपली प्रतिक्रिया द्या. आणि ही पोस्ट आवडल्यास नक्की शेअर करा. जेणेकरून अधिकाधिक वाचक याचा आस्वाद घेऊ शकतील.

तसेच हा उपक्रम कसा वाटतोय, हे आम्हाला जरूर कळवत जा. आपल्या सूचना, तक्रारी, आक्षेप नोंदवत राहा. उपरोल्लेखित मराठी वृत्तपत्रांखेरीज अन्य आपल्याला सुचवायची असतील, त्यातील अग्रलेख आपल्याला आवडत असतील तर तेही कळवा. त्यांचा समावेश या सदरात करून घ्यायला आम्हाला नक्की आवडेल.

सुधन्वा कुलकर्णी

हा लेख वाचण्यासाठी आपल्याला 'निवडक' नियतकालीकाचे सभासदत्व घ्यावे लागेल. 'निवडक' सभासदत्वासाठी इथे क्लिक करा.

Leave a Reply

Close Menu