हॉटेल चालवणं खायचं काम नाही !!

असं म्हटलं जातं की लोकांच्या हृदयापर्यंतचा प्रवास पोटातून सुरु होतो. म्हणजे ज्याचे मन आपल्याला जिंकायचे आहे त्याला चांगले, त्यांच्या पसंतीचे पदार्थ बनवून खायला घाला. उच्चपदस्थ, राष्ट्राध्यक्ष यांच्यात चाललेली dinner diplomacy हेच तर दर्शवतेपूर्वी नवविवाहितेला सांगण्यात यायचे की बाई ग नवऱ्याला जिंकण्याचा मार्ग त्याच्या पोटातून जातो.

                  पण माझा स्वतःचा प्रवास मात्र हृदयापासून सुरू होऊन पोटाकडे गेला. म्हणजे त्याचं असं झालं की मी माझं शिक्षण संपताच डॉक्टर माधव साने , माझा भाऊ अतुल भिडे आणि वहिनी डॉक्टर मधुरा भिडे या तिघांच्याबरोबर वैद्य साने आयुर्वेद लॅब ही कंपनी सुरू केली होती. कालांतराने डॉक्टर रोहीत साने आम्हाला सामिल झाला आणि मग त्याच्याबरोबर 'माधवबाग' ही  हृदयावर आयुर्वेदीक पद्धतीने विना-शस्त्रक्रिया उपचार करणारी १२० क्लिनिक आणि २ हॉस्पिटल्सची चेन आम्ही विकसित केली. आजही लाखो हृदयरोग्यांवर त्या माध्यमातून उपचार केले जातात. अगदी अलिकडे म्हणजे २०१५ च्या जानेवारीत मी शेफ सनी पावसकर बरोबर 'मेतकूट' हे मराठी पदार्थाचे रेस्टॉरंट सुरु केलं. म्हणून म्हटलं की माझा प्रवास हृदयाकडून पोटाकडे झालाय. 
 
                   असो, माझं शिक्षण इंजिनिअरिंगचं. त्यामुळे तुमच्या लक्षात आलं असेलच की मला हृदयविकारात जसं ओ की ठो कळत नव्हतं तोच प्रकार रेस्टॉरंटच्या बाबतीत. पण म्हणतात ना पाण्यात पडलं की माणूस पोहायला शिकतो. तसा मी ही शिकलो. पण त्या आधी नाकातोंडात पाणी जाऊन जीव गुदमरण्याचे प्रसंग याही प्रवासात आले. पण पोहायला शिकलेला माणूस जसं त्याकडे गम्मत म्हणून बघतो तशीच गम्मत मला आमचे सुरुवातीचे दिवस आठवले की वाटते. इतके दिवस 'गिऱ्हाईक' म्हणून हॉटेलकडे पाहणाऱ्या मला अचानक  हॉटेलच्या आतल्या जगाचा साक्षात्कार झाला. कृष्णाचे जगावेगळे रूप पाहून अर्जुनाची भावावस्था काय झाली माहित नाही पण मी मात्र हॉटेलचे हे 'अंतरंग' पाहून बावचळलो, गुदमरलो. गिऱ्हाईक म्हणून हॉटेलवाल्यांना विविध प्रसंगी घातलेल्या शिव्या आठवल्या. हॉटेलवाल्यांच्या नजरेने ते सगळे प्रसंग अनुभवले. टिका करणं आणि प्रत्यक्ष त्यावर काम करणं यातला जमीन आसमानाचा फरक जाणवला. आणि मग मी  सगळ्या उडप्याना, पंजाब्याना मनोमन हात जोडले. सगळ्या काणे, तांबे, टेंबे, लिमये, सरजोशी, जोगळेकर, पणशीकरांना दंडवत घातला. 
 
                   मंडळी, येत्या काही लेखांमधे हेच माझे काही अनुभव तुमच्यासमोर मांडणार आहे. हॉटेलचे 'अंतरंग' तुमच्यासमोर उलगडून दाखवणार आहे. कदाचित तुमचीही नजर बदलेल हॉटेलवाल्यांकडे बघण्याची कारण तोपर्यंत माझ्यासारखे तुम्हीही म्हणायला लागले असाल ''हॉटेल चालवणे म्हणजे खायचे काम नाही''.

‘हॉटेल चालवणं खायचं काम नाही !!’ चे सभासदत्व* घ्या.

हॉटेल चालवणं खायचं काम नाही !!

महाग की स्वस्त?

किरण भिडे | 07 Apr 2021

खरं तर महाग किंवा स्वस्त हे दोन अर्थविषयक शब्द आपण वापरत असलो त्याच्या मागे फक्त आर्थिक कारण किंवा विचार नसतो. खरं कारण असतं ते आपल्या मनातलं त्या गोष्टीचं perception किंवा दृष्टीकोन.

बहुविध.कॉम

आम्ही आहोत साहित्य व्यवहारातले ‘शबरी’!
तुम्हाला शबरीची बोरे माहिती आहेतच. बोरे चाखून, त्यातली जी उत्तम होती ती शबरीने श्रीरामाला अर्पण केली होती. त्याच धर्तीवर “बहुविध डॉट कॉम” या उपक्रमाद्वारे साहित्य व्यवहारातील शबरीची भूमिका आम्ही करत आहोत. त्याच निष्ठेने उत्तमातलेही उत्तम साहित्य तुमच्यापर्यंत पोचवण्यासाठी आम्ही प्रयत्नशील आहोत. साहित्याची निवड करताना सर्व प्रकारचा रसास्वाद मिळून तुमचे साहित्यिक भावविश्व कसे समृद्ध होइल हे आम्ही काळजीपूर्वक पाहतो. नव्या काळाशी सांधा जोडत हा सगळा व्यवहार आम्ही डिजिटल प्लॅटफॉर्मवर करत आहोत. म्हणजे वाचण्यासाठी तर आहेच, ऐकण्यासाठी आणि पाहण्यासाठी देखील कसदार कंटेंट इथे मिळत राहणार आहे. बोरे जशी विविध प्रकारांची,रंगांची, आकारांची असतात तसेच साहित्यही बहुधांगी असते. मराठी भाषेत गेल्या शे-दीडशे वर्षात हजारो लेखकांनी, अनेक विषयांवर साहित्य निर्मिती केली आहे. त्यातले कसदार साहित्य निवडून ‘पुनश्च’ अंतर्गत या डिजिटल व्यासपीठावरुन देत आहोत. त्याशिवाय चित्रपटविषयक दर्जेदार ‘रूपवाणी’, साहित्य व्यवहारातील मानाचे पान ‘ललित’ मासिक, बाल-कुमारांचे उत्तम मनोरंजन करणारे ‘वयम्’, भाषेचा चहुअंगी वेध घेणारे ‘मराठी प्रथम्’ अशा विविध नियतकालिकांच्या रूपात ही बहुविविधता दिसेल.

अतिरिक्त माहिती

आपण जर का या व्यासपीठावरील कोणत्याही साहित्यामुळे नाराज झाला असाल अगर आपल्या भावना दुखावल्या असतील तर [email protected] या मेल आयडीवर लगेच संपर्क साधा.